சுலவேசி தீவில் ஏற்பட்ட நிலநடுக்கம் மற்றும் ஆழிப்பேரலைத் தாக்கத்தால் உயிரிழந்தோரின் எண்ணிக்கை 384 ஆக உயர்வடைந்துள்ளது

இந்தோ​னேஷியாவின் சுலவேசி தீவில் ஏற்பட்ட நிலநடுக்கம் மற்றும் ஆழிப்பேரலைத் தாக்கத்தால் உயிரிழந்தோரின் எண்ணிக்கை 384 ஆக உயர்வடைந்துள்ளது.

7.5 ரிக்டர் அளவில் பதிவாகிய பாரிய நிலநடுக்கத்தைத் தொடர்ந்து, பாலு நகரின் கரையோரப் பிரதேசங்களை ஆழிப்பேரலை தாக்கியதாக அதிகாரிகள் தெரிவித்துள்ளனர்.

9.8 அடி உயரத்திற்கு அலைகள் எழுந்துள்ளன. இதனால் கட்டடங்கள், மதவழிபாட்டுத்தலங்கள் ஆகியன இடிந்து வீழ்ந்துள்ளன. மேலும், சுற்றுலாத்தலமொன்றும் அலைகளால் அடித்துச் செல்லப்பட்டுள்ளது.

பாலு நகரம் கட்டட இடிபாடுகளுடன் காட்சியளிப்பதாக சர்வதேச ஊடகங்கள் தெரிவித்துள்ளன.

ஆழிப்பேரலை தாக்கிய போது, பல்பொருள் அங்காடியில் இருந்த 3,80,000 பேர் காப்பாற்றப்பட்டதாகவும் தெரிவிக்கப்பட்டுள்ளது.

இந்தோ​னேஷியாவின் சுலவேசி தீவில் ஏற்பட்ட 7.5 ரிக்டர் அளவிலான பாரிய நிலநடுக்கத்தினைத் தொடர்ந்து, விடுக்கப்பட்டிருந்த சுனாமி எச்சரிக்கை தளர்த்தப்பட்ட சிறிது நேரத்தில் சுனாமி தாக்கியுள்ளது.

இந்தோனேஷியாவின் லொம்பொக் தீவில் கடந்த ஜூலை மற்றும் ஆகஸ்ட் மாதங்களில் ஏற்பட்ட நிலநடுக்கங்களில் 500 பேர் உயிரிழந்தனர்.

2004 டிசம்பர் 26 ஆம் திகதி இந்தோனேஷியாவின் சுமாத்ரா கடற்பகுதியில் ஏற்பட்ட மிகப்பெரிய நிலநடுக்கத்தால் ஏற்பட்ட சுனாமியால் இந்து சமுத்திரப் பிராந்தியங்களில் 2, 26,000 பேர் உயிரிழந்தனர். இவர்களில் 1,02,000 பேருக்கு மேல் இந்தோனேஷியாவைச் சேர்ந்தவர்கள் என்பது குறிப்பிடத்தக்கது.

Sharing is caring!