அருமையான ருசியில் செய்து அசத்துங்கள் சிக்கன் ப்ரோக்கோலி வறுவல்

சப்பாதி, நாண், பூரிக்கு தொட்டு கொள்ள அருமையாக இருக்கும் சிக்கன் ப்ரோக்கோலி வறுவல் செய்து கொடுத்து குடும்பத்தினரை அசத்துங்கள். இதன் ருசியில் மயங்கி மீண்டும், மீண்டும் வேண்டும் என்று கேட்டு சாப்பிடுவார்கள்.

தேவையான பெருட்கள்: ப்ரோக்கோலி – ஒரு கப், இஞ்சி – ஒரு டீஸ்பூன், சிக்கன் – கால் கிலோ, மஞ்சள் தூள் – அரை டீஸ்பூன், சோயா சாஸ் – 1 டீஸ்பூன், கொரகொரப்பாக பொடித்த காய்ந்த மிளகாய் – 1 டீஸ்பூன், இஞ்சி பூண்டு விழுது – ஒரு டீஸ்பூன், எலுமிச்சை சாறு – அரை டீஸ்பூன், மிளகுத்தூள் – ஒரு டீஸ்பூன், கொத்தமல்லி – சிறிதளவு, எண்ணெய், உப்பு – தேவையான அளவு

செய்முறை: முதலில் ப்ரோக்கோலியை துண்டுகளாக நறுக்கி கொள்ளவும். கொத்தமல்லியை பொடியாக நறுக்கி கொள்ளவும். சிக்கனை நன்றாக சுத்தம் செய்து சிறிய துண்டுகளாக வெட்டி ஒரு கிண்ணத்தில் போடவும்.

அத்துடன், மஞ்சள் தூள், இஞ்சி பூண்டு விழுது, சோயா சாஸ், எலுமிச்சை சாறு, கொரகொரப்பாக பொடித்த காய்ந்த மிளகாய், உப்பு சேர்த்து நன்றாக கலந்து சுமார் 30 நிமிடங்கள் ஊறவிடவும்.

பிறகு, வாணலியை அடுப்பில் வைத்து எண்ணெய்விட்டு சூடானதும் சிக்கன் துண்டுகளை போட்டு பொரித்து எடுக்கவும். சிக்கன் துண்டுகள் வெந்ததும் தனியாக எடுத்து வைக்கவும். மீண்டும் வாணலியில் எண்ணெய்விட்டு சூடானதும், பொடியாக நறுக்கிய இஞ்சி சேர்த்து நன்றாக வதக்கிக் கொள்ளவும்.

அடுத்து அதில் ப்ரோக்கோலியை போட்டு சிறிது நேரம் வதக்கவும். அடுத்து அதனுடன் தண்ணீர், உப்பு சேர்த்து மூடிப்போட்டு வேகவிடவும். ப்ரோக்கோலி பாதியளவு வெந்ததும், பொரித்த சிக்கன் துண்டுகளை சேர்த்து மீண்டும் கிளறிவிடவும்.

அத்துடன், ஒரு டீஸ்பூன் சோள மாவுடன் தண்ணீர் சேர்த்து கரைத்து சேர்த்து கிளறி வேகவிடவும். இறுதியாக, மிளகுத்தூள் தூவி 2 நிமிடங்கள் கழித்து கொத்தமல்லி சேர்த்து கிளறி இறக்கவும். சூப்பரான சிக்கன் ப்ரோக்கோலி ரெடி..

Sharing is caring!