காய்ச்சலைக் கண்டு பிடிக்க Sun Glass !! இனி யாரும் மறைக்க முடியாது..

கொரோனா வைரஸ் இப்போது உலகம் முழுவதும் பரவி பெரும் பாதிப்புகளை ஏற்படுத்திவருகிறது. இந்த வைரஸால் உலக நாடுகள் அனைத்தும் பாதிக்கப்பட்டுள்ளன.

தற்போது வரை உலகம் முழுவதும் ஒன்பது லட்சத்திற்கும் மேற்பட்டோர் இந்தத் தொற்றுநோயால் பாதிக்கப்பட்டுள்ளனர். கொரோனா வைரஸ் பரவ ஆரம்பித்த நாடான சீனாவில் , தற்போதுதான் படிப்படியாக ஊரடங்கு விலக்கப்பட்டு மக்கள் பொது இடங்களுக்குச் செல்ல தொடங்கியுள்ளனர்.

இந்நிலையில் , சீனாவில் காய்ச்சலைக் கண்டுபிடிக்க செயற்கை நுண்ணறிவுக் கருவி ஒன்றைப் பயன்படுத்துகின்றனர். செயற்கை நுண்ணறிவு நிறுவனமான ‘ரோகிட்’ காய்ச்சலை இரண்டே நிமிடங்களில் கண்டறியும் கருவியை வடிவமைத்துள்ளது.

இந்தக் கண்ணாடிகளை ஜனவரி மாதம் முதலே , ஹாங்ச்சாவு ( Hangzhou ) நகரில் உள்ள பாதுகாப்புப் பணியாளர்களுக்கு இந்நிறுவனம் வழங்கி வந்துள்ளது. இந்தக் கண்ணாடி மூலம் 2 நிமிடங்களில் நூற்றுக்கணக்கான மக்களின் உடல் வெப்ப நிலையைக் கண்டறிய முடியும்.

இந்த ஸ்மார்ட் கண்ணாடிகளின் எடை 100 கிராம் தான். மேலும் , இந்தக் கண்ணாடிகள் பார்ப்பதற்கு சாதாரண கண்ணாடி போலவே உள்ளது. ஆனால் , வெப்பநிலையைக் கண்டறிவதற்காக இதனுடன் கூடுதலாக தெர்மல் இமேஜிங் கேமரா மற்றும் கேபிள் ஒன்றும் பொருத்தப்பட்டுள்ளன.

செயற்கை நுண்ணறிவு, ஏற்கெனவே பல துறைகளில் பயன்பாட்டிற்கு வந்துவிட்டது. தற்போது இப்படி காய்ச்சலைக் கண்டறிவதற்கும் பயன்படுத்தப்படுகிறது. இதை வைத்துக் கொண்டு சீனாவின் கிழக்குப் பிராந்தியத்தில் உள்ள ஹாங்யூஹான் ( Hongyuan ) பூங்காவில் வேலை செய்யும் பாதுகாப்புப் பணியாளர்கள், மக்களின் வெப்பநிலையைக் கண்காணித்து வருகின்றனர்.

இதை அணிந்துகொண்டு 1 மீட்டர் தொலைவிலிருந்தே உங்களால் வெப்ப நிலையைக் கண்டறிய முடியும். இதற்கு முக்கியக் காரணம், தொடர்பில்லாமல் வெப்பத்தைக் கண்டறியும் AR ( augmented reality ) திறனே ஆகும். இந்தக் கண்ணாடி மூலம் அதிக உடல் வெப்ப நிலை கண்டறியப்பட்டால், உடனே எச்சரிக்கை அளிக்கிறது.

இவற்றோடு, அந்த நபரின் முக அடையாளத்தை சேமிக்கும் ஃபேஷியல் ரெகக்னைசன்  ( facial recognition )தொழில் நுட்பமும் உள்ளது. மேலும், அவர்களைப் பற்றிய தகவல்களையும் டிஜிட்டல் வழியே சேகரித்துக்கொள்கிறது.

கொரோனா வைரஸ் பாதிப்பைக் கண்டறிய ஒவ்வொரு நாடும் புதிய புதிய கண்டுபிடிப்புகளை மேற்கொண்ட வண்ணம் உள்ளன. இந்தத் தொற்றின் முதல் அறிகுறியாக காய்ச்சலே உள்ளது.

இந்தக் காய்ச்சலைக் கண்டறிய உதவும் செயற்கை நுண்ணறிவுக் கண்ணாடி சோதனை முறையை இன்னும் சுலபமாக்கியுள்ளது.

Sharing is caring!